Nga Fetah Bahtiri

 

DOLI NGA SHTYPI THESARI KOMBËTAR 7 e 8

Doli nga shtypi libri i titulluar Thesar Kombëtar i Mërgatës Shqiptare në Suedi, vëllimi 7 e 8 botime këto të Shoqatës së Shkrimtarëve dhe Artistëve Shqiptarë ”Papa Klementi XI Albani”, Suedi.

Sikur edhe numrat e mëparshëm të Thesarëve, 1, 2, 3, 4, 5, 6 edhe këta dy numra 7 e 8 janë shkruar nga shumë anëtarë dhe joanëtarë të Shoqatës sonë dhe për synim kryesor kanë ndriçimin e veprimtarisë dhe angazhimin e komunitetit shqiptar në Skandinavi e më gjerë në shërbim të atdheut dhe të kombit.

Ne, komuniteti shqiptar në Suedi, jemi të përcaktuar që t´i shërbejmë atdheut në mënyra të ndryshme, prandaj në Thesarët… tanë kemi paraqitur dokumente e fotografi të ndryshme e të shumta, të cilat flasin me gjuhën faktografike për atë se kush dhe si ka vepruar për ta ndihmuar atdheun. Këta dy numra i quajmë Thersarë…, sepse me të vërttetë janë thesarë. Janë thesarë, në radhë të parë sepse nuk janë vëzhgime e vështrime nga kënde të ndryshme personale e subjektive, por, ajo që paraqitet e thuhet në librat që i përurojmë sot, thuhet e bëhet vetëm e vetëm duke u mbështetur në dokumente e në fakte. Pra, Thesarët… tanë janë dokumentarë të kohës, janë brum për studime e hulumtime edhe në kohët që vijnë pas nesh.

Thesarët…, që të gjithë, e edhe këta dy numra, kanë vetëm një ngjyrë: ngjyrën patriotike, kombëtare, çdo gjë është e argumentuar me dokumente origjinale. Konsiderojmë se pikërisht kjo është vlera më e madhe dhe më e çmuar e tyre. Për shembull Thesari… nr. 8 përfshin listat origjinale të atyre që kanë dhënë kontribut duke ndarë 3% nga kafshata e gojës për vitet 1996, 1997 dhe 1998 për popullin e shtrypur e të ndrydhur në Kosovë nga okupatori shekullor dhe për funksionimin e Republikës së Kosovës, përfshin listat origjinale të kontributdhënësve nga Suedia për Drenicën në vitin e tmerrshëm 1998, përfshin ndihmat për rastet e jashtëzakonshme në Suedi si dhe ndihmat për shkollën e mesme në Shalë të Bajgorës – të gjitha këto realizuar në periudhën më të vështirë të atdheut, kur i nevojitej ndihma për të mbijetuar ferrin.

Edhe Thesari… nr. 7 përfshin materiale të shumta e të llojllojshme që gjithnjë kanë të bëjnë me veprimtarinë dhe kontributin e mërgatës shqiptare në Suedi në shërbim të atdheut. Secili material, secili pohim, është i argumentuar me dokumente origjinale, fotografi etj. Në këtë numër ndodhen edhe disa krijime letrare, poezi dhe materiale të tjera të cilat reflektojnë nivelin krijues të autorëve që i botojnë ato.

Kështu, pra, ne, Shoqata jonë, kemi vepruar, kemi punuar, i kemi grumbulluar dokumente, jemi bërë shërbëtorë të atdheut dhe sot të gjitha këto nxjerrim në dritë dhe ua servojmë lexuesve e shkencës. Prandaj këta libra janë xhevahire të vërteta e të çmuara, janë thesarë.

Përndryshe, theksimi im këtu se këta libra janë thesarë të çmuar nuk është vetëm i imi, por ky është vlerësim edhe i organeve, institucioneve dhe profileve kompetente shkencore, i doktorëve të shkencave, kritikëve letrarë etj.

Sot Shoqata jonë është e vendosur, e përkushtuar dhe po punon intensivisht e me vetëmohim, gjithnjë me punë vullnetare, për përgatitjen dhe botimin  edhe të numrave të tjerë të Thesarëve…